UZINDUZI WA CHANGOCHAATA MAKETE

Tarehe Iliyowekwa: March 25th, 2023

Mwenyekiti wa Chama cha Ngoma na chakula  cha asili Tanzania (CHANGOCHAATA) Taifa Eng Johnsoni Kashasha amesema chama hicho kinathamini na kutambua kwa kiasi kikubwa juhudi za Serikali ya Tanzania chini ya  Rais wa Jamhuri ya Muungano wa Tanzania Mhe. Dkt Samia Suluhu Hassani katika kuendelea kuthamini na kukuza utamaduni wa Watanzania.

Kashasha ameyasema hayo hii leo wakati wa uzinduzi wa chama hicho Kitaifa hafla uliofanyika katika ukumbi wa Jeni Mangwangwa Makete mjini ambapo amesema Rais Samia Suluhu Hassan amekuwa mdau namba moja katika kukuza na kuendeleza  utamaduni wa Tanzania ikiwa ni pamoja na kurahisisha upatikanaji wa mikopo kwa wasanii.

Katika hatua nyingine kashasha amesema uwepo wa chama hicho sasa ni ishara kuwa kitakuwa na mchango mkubwa katika kuhakikisha utamaduni wa Tanzania unakuwa na kulindwa huku akiomba viongozi kutoka kwenye mihimili yote ya Nchi wakitambue chama hicho na kutoa ushirikiano ili adhima ya uanzishwaji wa chama hicho ikiwemo kuendeleza na kukuza utamaduni wa Tanzania ifikiwe.

Katibu Tawala Wilaya ya Makete Grace Mgeni kwa niaba ya mgeni rasmi  ambae alitakiwa awe ni Waziri wa Utamaduni, Sanaa na Michezo Mhe.  Balozi Dkt. @pindi.chana amewapongeza uongozi wa CHANGOCHAATA kwa kuanzisha chama hicho kwani Tanzania inasifika kwa kuwa na umoja, utulivu na mshikamono vyote vinatokana na utamaduni walionao watanzania

CHANGOCHAATA kimeanzishwa na kusajiliwa na baraza la Sanaa la Taifa BASATA mwaka 2022 kikiwa na lengo la kukuza na kuendeleza utamaduni wa Tanzania