Vijana wajipanga Mapinduzi ya Kilimo Makete

Tarehe Iliyowekwa: August 31st, 2022

Vijana 150 kutoka Kata ya Ikuwo na Kigala wamejipanga kuweka kambi kwa ajili ya kuanza Kilimo cha kisasa ili kuzalisha zao la Ngano kwa wingi zaidi.

Vijana hao wamepata hekari zaidi ya 300 katika Kijiji cha Mlengu Kata ya Kigala ili kufanya shughuli ya uzalishaji wa Ngano na Viazi Mviringo katika kujikwamua kiuchumi .

Wakizungunza na Mkurugenzi Mtendaji Halmashauri ya Wilaya Makete Ndg. William Makufwe, Afisa Maendeleo ya Jamii Bi. Jacline Mroso, Afisa Kilimo Aniseti Ndunguru, Katibu wa UVCCM Wilaya Ndg. Hassan Kapolo, Watendaji wa Kata zote mbili, Maafisa Kilimo Kata pamoja na Waheshimiwa Madiwani wa Ikuwo na Kigala wamesema wako tayari kuzalisha kwa tija ili kuwainua Vijana kiuchumi.

Kwa niaba ya vijana wengine Ajuaye Ngulo kutoka Kijiji cha Kigala anasema “tunaishukuru Serikali kwa kuliona kundi hili muhimu lenge nguvu kubwa ya uzalishaji kwa Taifa, tuwahakikishie kwamba tupo tayari kuweka kambi hap ana kuanza kazi mara moja”.

Mkurugenzi Mtendaji Wilaya ya Makete amesema Halmashauri ipo tayari kuwapa mkopo wa zaidi ya Milioni 100 kabla ya msimu wa Kilimo cha ngano kuanza mwishoni mwa mwaka huu Vijana hao wawe wameshapata fedha hizo.

"Tunatambua kuwa Kilimo ni uti wa mgongo na fedha nyingi zinapatikana kwenye Kilimo tuwapongeze kwa utayari wenu na Serikali ipo tayari kutoa fedha kwa ajili ya kusaidia kundi hili la Vijana ambalo ndio tegemezi kwa Taifa".

KUTAZAMA VIDEO BONYEZA HAPA

Afisa Kilimo Wilaya Aniseti Ndunguru amesema Serikali imeweka ruzuku kwenye Mbolea na itagawa mbegu za ngano bure kwa wakulima, hivyo Vijana hao wanaweza kuwa ni miongoni mwa wanufaika wa ruzuku hizo.

Afisa Maendeleo Wilaya Bi. Jackline mroso ameagiza Vijana hao kuunda Vikundi haraka iwezekanavyo ili waweze kusajiliwa na kuanza kunufaika na mikopo ya 10%