WAANDIKISHAJI WASAIDIZI WA VITUO PAMOJA WAENDESHA VIFAA VYA BAYOMETRIKI WATAKIWA KUFANYA KAZI KWA WELEDI MKUBWA

Tarehe Iliyowekwa: January 9th, 2025

Waandikishaji Wasaidizi ngazi ya Kituo pamoja na Waendesha vifaa vya Bayometriki wametakiwa kufanya kazi kwa weledi mkubwa ili zoezi la Uboreshaji wa Daftari la Kudumu la Mpiga kura, liweze kuwa lenye tija, kuelekea Uchaguzi mkuu mwishoni mwa mwaka huu.

Hayo yamebainishwa leo Januari 9,2025 na Mjumbe wa Tume Huru ya Taifa ya Uchaguzi, Mhe. Jaji Asina Abdillah Omari, wakati akiongea na Waandikishaji Wasaidizi pamoja na Waendesha vifaa vya Bayometriki kwa kanda mbili za Iwawa na Tandala kwenye mafunzo ya Siku mbili, kuelekea uboreshaji wa Daftari la Kudumu la Mpiga kura.

“kumbukeni kuwa Mafunzo haya pamoja kazi yenu ipo kwa mujibu wa sheria, kanuni na taratibu zake, hivyo hakikisha kuwa huendi kuwa kikwazo wala kuharibu zoezi hili, kwakuwa utakuwa umevunja sheria, hivyo ukimaliza mafunzo haya nenda kafanye kazi kiuweledi na kiufasaha” Alisema Mhe. Jaji Asina A. Omari.

Aidha, Mhe. Jaji Asina, ameongeza kuwa, kila Mwandikishaji na Mwendesha kifaa cha Bayometriki anatakiwa kuielewa vizuri mifumo ya uandikishaji wapiga kura kwenye daftari la kudumu, kutokana na kuboreshwa kwa Vifaa vya Bayometriki, sambamba na kushirikiana vizuri katika kazi, pamoja na kuwa na kauli nzuri kwa watu watakaokuja kuboresha taarifa zao, ama kujiandikisha.

Kwa Upande wake, Kaimu Mkurugenzi wa Halmashauri ya Wilaya ya Makete, Ndg. Mathias Mbafu, amewaasa waandikishaji hao pamoja na waendesha vifaa vya Bayometriki, kutunza siri za wananchi ambao wameenda kupata hudumua hiyo ya kujiandikisha kwenye vituo hivyo.

Naye Afisa Mwandikishaji wa Jimbo la Makete Bi. Jacklina Mrosso, amewasisitiza usafi wa kazi pamoja na Uzalendo wakati wa uandikishaji wa Wapiga kura kwenye daftari la kudumu la mpiga kura, ikiwa ni pamoja na kufuata taratibu, kanuni na sheria zilizowekwa na Tume.

Hata hivyo, Afisa Uchaguzi Jimbo la Makete, Ndg. Castory Ngonyani, amewasihi waandikishaji hao kufungua vituo mapema kama kmuda ulivyopangwa, pamoja na kuhakikisha kuwa wanajaza fomu kiufasaha ili kutokosea uwekani wa taarifa za watu ambao wataenda kujiandikisha.

Ikumbukwe kuwa, Tume Huru ya Taifa ya Uchaguzi, INEC, ipo katika zoezi la Uboreshaji wa Daftari la Kudumu la Mpiga Kura, ikiwa ni mchakato wa kuelekea kwenye Uchaguzi mkuu mwishoni mwa mwaka huu wa 2025, ambapo kwa Wilaya ya Makete, Uandikishaji huo, utaanza Januari 12 hadi 18,2025,