WAANDISHI WA HABARI NJOMBE & RUVUMA WAPIGWA MSASA KUHUSU SENSA 2022

Tarehe Iliyowekwa: September 18th, 2023

Waandishi wa Habari zaidi ya 70 kutoka Mkoa wa Njombe na Ruvuma wameanza mafunzo ya siku 2 yanayohusu matumizi ya matokeo ya Sensa ya watu na makazi 2022.

Mafunzo hayo yanatolewa na Ofisi ya Taifa ya Takwimu kuanzia tarehe 18-19 Septemba, 2023 katika ukumbi wa Halmashauri ya Mji Njombe yamefunguliwa na Mkuu wa Mkoa wa Njombe Mhe. Anthony Mtaka ambaye amewasihi Waandishi wa Habari kutoa taarifa sahihi kwa kutumia takwimu ili Jamii iweze kutumia takwimu hizo kiuchumi na kujiletea maendeleo.

Mhe. Mtaka amesema “ili jamii inufaike zaidi na taarifa za Sensa kiuchumi na kijamii waandishi wa habari ni vizuri mkaisaidia kutoa taarifa sahihi kwa kutumia takwimu ili kusaidia jamii na Taifa kwa ujumla iweze kupanga vizuri mipango ya kimaisha na kimaendeleo”

Kamisaa wa Sensa na Spika wa Bunge Msitaafu aliyewahi kuhudumu nafasi ya Uwaziri wa Habari nchini Mhe. Anne Makinda amesema vyombo vya habari vimetoa mchango mkubwa nchini katika zoezi la utoaji elimu ya Sensa 2022 hususani Redio za Kijamii na kupongeza kwa ushirikiano huo walioufanya waandishi wa Habari kwa Serikali yao.

“Tofauti na miaka iliyopita, Sensa ya 2022 Waandishi wa Habari hususani Redio ya Kijamii mmefanya kazi kubwa ya kuhabarisha Jamii na Tasnia hii inamchango mkubwa katika kutoa habari zinazohusu takwimu ili kusaidia jamii kuwa na uelewa mpaka wa kujua takwimu”.

Kwa niaba ya Waandishi wa Habari, Mwenyekiti wa Chama cha Waandishi wa Habari Mkoa wa Njombe Damiani Kunambi ameipongeza Serikali kupitia Ofisi ya Taifa ya Takwimu kwa kutambua mchango mkubwa unaotolewa na vyombo vya Habari katika upatikanaji wa taarifa zinazohusu Sensa 2022 na kutoa mafunzo yatakayoongeza weledi katika majukumu ya upashanaji habari kati ya Wanahabari na Jamii inayowazunguka.

Serikali kupitia Ofisi ya Taifa ya Takwimu ilifanya Sensa ya watu na makazi mwaka 2022 ambayo hufanyika kila baada ya miaka 10 ili kupata taarifa mbalimbali kwa lengo la kujua idadi ya watu, makazi, shughuli za kiuchumi zinazofanywa na wananchi wake ili iweze kupanga mipango mikakati na kuwa na Dira ya Maendeleo