WADAU WA KILIMO WAKARIBISHWA KUWEKEZA WILAYANI MAKETE

Tarehe Iliyowekwa: September 26th, 2023

Mkurugenzi Mtendaji wa Halmashauri ya Wilaya ya Makete, Ndg. William Makufwe, ametoa rai kwa watanzania wote kuwekeza katika kilimo cha Ngano wilayani Makete, ili kupunguza gharama za uagizaji wa bidhaa hiyo nje ya nchi.

Ndg. Makufwe amesema hayo leo September 26, 2023, wakati ametembelea banda la H/W ya Makete, katika maonesho ya Utalii Karibu Kusini, ambayo yanafanyika katika viwanja vya Kihesa Kilolo vilivyopo Manispaa ya Iringa, mkoani humo.

Aidha Ndg. Makufwe amesema kuwa, uwekezaji huo unatija kubwa kwa taifa la Tanzania kutokana na kuwepo kwa ngano nyingi ambayo inaagizwa kutoka mataifa mbalimbali, hivyo fursa ya kilimo cha zao hilo wilayani Makete itapunguza uagizwaji, pamoja na matumizi ya fedha za kigeni.

Sambamba na hayo, Mkurugenzi huyo wa Halmashauri ya Wilaya ya Makete, Ndg. WilliaM Makufwe, amesema kuwa hadi sasa zaidi ya tani 1000 za mbegu ya Ngano imeshawasili wilayani Makete, tayari kwa kugawiwa wawekezaji ambao watakuwa tayari kufanya kilimo chenye tija.

Imeandaliwa na

Ombeni Mgongolwa,

Kaimu Mkuu wa Kitengo cha Mawasiliano Serikalini.

Halmashauri ya Wilaya ya Makete.