WAHESHIMIWA MADIWANI WILAYA YA MAKETE WATAKIWA KUSHIRIKIANA NA WANANCHI KUKUZA UCHUMI WILAYANI HUMO

Tarehe Iliyowekwa: December 16th, 2024

Mstahiki Meya wa Halmashuri ya Jiji la Dodoma, Mhe. Prof. Davis Mwamfupe, amewataka waheshimiwa madiwani wa Halmashauri za Wilaya ya Makete pamoja na Igunga, kushirikiana na wananchi katika shughuli zao za kila siku ili kuweza kukuza uchumi pamoja na maendeleo kwenye halmashauri zao.

Mhe.Prof. Mwamfupe, amesema hayo leo Desemba 16,2024, wakati akiwakaribisha Waheshimiwa Madiwani wa Halmashauri hizo mbili za Makete na Igunga, ambao wametembelea Halmashauri ya Jiji la Dodoma, ili kuweza kujifunza shughuli mbalimbali za uendeshaji wa Halmashauri pamoja na kuanzishwa kwa miradi mikubwa ya kimaendeleo.

“Halmashauri zetu zihakikishe zinabuni vyanzo vingine vya mapato, pamoja na kuboresha ile iliyopo ili Serikali yetu, ya Jamhuri ya Muungano wa Tanzania, iweze kutekeleza miradi ya Maendeleo kwa wananchi” alisema Mhe. Prof. Mwamfupe.  

Sambamba na hayo, Mhe. Prof. Mwamfupe, amewapongeza madiwani hao kwa kushirikiana vizuri katika uchaguzi wa Serikali za Mitaa, ambao Chama cha Mapinduzi kimeshinda kwa kishindo.

Kwa Upande wake, Mkuu wa Wilaya ya Makete, Mhe. Juma S. Sweda, amesema kuwa, ziara ya kuitembelea Halmashauri ya Jiji la Dodoma, ikawe na tija katika halmashauri yenu, ili mkafanye maamuzi sahihi ya kuhakikisha maendeleo yanakuwa kwa kasi, na wananchi wananufaika na ukuaji wa uchumi.

Ikumbukwe, kuwa waheshimiwa Madiwani la Halmashauri ya Wilaya ya Makete, wakiongozwa na Mwenyekiti wa Halmashauri ya Wilaya ya Makete, wapo katika ziara ya Kujifunza kwenye Halmashauri ya Jiji la Dodoma, ili kuweza kujionea namna bora ya kuendesha miradi ya kimaendeleo katika halmashauri hiyo. 

Pia, katika ziara hiyo, Madiwani hao wa Halmashauri ya Wilaya ya Makete, wameongozana na Mkuu wa Wilaya ya Makete, Mhe. Juma S. Sweda, Mkurugenzi Mtendaji wa Halmashauri ya Wilaya ya Makete,  Wakuu wa Idara pamoja na Vitengo mbalimbali.