WAKAZI WILAYANI MAKETE WASHAURIWA KUPANGA MITI KWENYE MAENEO YA WAZI ILI KUTUNZA MAZINGIRA

Tarehe Iliyowekwa: February 23rd, 2024

Wananchi wilayani Makete, Mkoani Njombe,leo Februari 23,2024,  wametakiwa kuyatunza mazingira kwa kupanda miti katika maeneo yenye uwazi ili kuepukana na uharibifu wa mazingira kama vile mmomonyoko wa udongo .

Hayo yamesemwa na mkuu wa Wilaya ya Makete Mh. Juma Sweda, wakati wa upandaji wa miti ya Mbao na maua katika shule ya Sekondari Man'goto iliyopo katika kata ya Man'goto wilayani Makete, huku akiupongeza uongozi wa shule hiyo na ofisi ya mazingira wilaya kwa kupanda miti katika eneo hilo.

Mhe. Sweda, ameongeza kuwa, miti hiyo inatakiwa kutunzwa kwa faida ya shule yao na kwakuwa itakuwa na msaada hapo baadae, katika shughuli mbalimbali za ujenzi katika shule hiyo.

Naye, Afisa Mazingira wa Halmashauri ya Wilaya ya Makete Bi. Upendo Mgaya, ameupongeza uongozi wa shule hiyo kwa kutunza mazingira kwa kupanda miti huku akiwataka kuitunza miti hiyo ili kuboresha mazingira ya shule yao, sambamba na kuweka mwonekano mzuri.

Kwa Upande wake, Mkuu wa shule hiyo Mwl. Dionis Venance Mgina, ameishukuru ofisi ya mazingira Wilaya kwa kushirikiana nao katika upandaji wa miti shuleni hapo huku akisema kuwa wataitunza miti hiyo kwa faida ya shule yao.

Zaidi ya miti 4500 inatarajiwa kupandwa katika shule hiyo na tayari hadi sasa imepandwa miti ya mbao na mapambo 2650 kwaajili ikiwa ni njia mojawapo ya utunzaji wa Mazingira Wilayani humo.