WAKUU WA IDARA NA VITENGO SHIRIKIANENI NA AFISA LISHE KUTOKOMEZA UDUMAVU -DED MAKUFWE

Tarehe Iliyowekwa: March 25th, 2024

Mkurugenzi Mtendaji wa Halmashauri ya Wilaya ya Makete, leo Machi, 25, 2024, amewataka Wakuu wa Idara na Vitengo, pamoja na Afisa Lishe Wilaya, kuhakikisha kuwa wanapambana kuondoa Udumavu Wilaya humo.

Ndg. Makufwe, amesema hayo leo wakati wa kikao cha kusikiliza, kupitia na kupokea taarifa za utekelezaji wa mkataba wa Afua za Lishe, wilayani Makete, na kubainisha kuwa Jukumu la kupambana na Udumavu wilayani Makete ni la kiongozi. 

"kila mtu awe na mkakati wa kuhakikisha kuwa, Udumavu unaisha Wilayani Makete, kila mmoja wenu atimize wajibu wake, kwa kushauriana na kuleta hamasa na matokeo chanya kwenye Vijiji vyenye changamoto ya Utapiamlo na Udumavu" Alisema Ndg. Makufwe.

Aidha, Ndg. Makufwe, amesema kuwa, Kila Shule ya Msingi lazima iwe na Bustani ya mboga na Matunda, ili watoto waweze kupata chakula bora chenye mchanganyiko wa makundi yote matano yanayotakiwa kuliwa na watoto.

Sambamba na hayo, Mkurugenzi Mtendaji, amewataka wakuu wa Idara na Vitengo, kushirikiana, kupendana katika kuhakikisha kuwa Halmqshauri ya Wilaya ya Makete, inakuwa kiuchumi, pamoja na kusimamia miradi ya maendeleo kimkakati.

Kwa Upande wake, Kaimu Mganga Mkuu wa Wilaya ya Makete, Dkt. Jonathan Kitundu, amesema kuwa wamepokea ushauri wa kamati ya Lishe, na kwamba watahakikisha kuwa wapambana kutokomeza Udumavu wilayani humo, ikiwa ni pamoja kushirikiana vizuri na Wakuu wa Idara na Vitengo.

Naye, Kaimu Afisa Lishe wa Wilaya ya Makete, Bi. Agnes Columban, akiwasilisha taarifa za Ukekelezaji Afua za Lishe, amesema kuwa, wameweka mikakati ya Kuwajengea uwezo wazazi wa Watoto namna ya kuandaa Lishe bora, Kuhakikisha kuwa kila Shule inakuwa na Bustani ya Mboga na Matunda, pamoja na Kuhamasisha kufuga wanyama wadogo kama vile kuku, Sungura na ikiwezekana Ng'ombe wa Maziwa.