WANANCHI MAKETE WATAKIWA KUTUNZA VYANZO VYA MAJI KWA KUPANDA MITI RAFIKI

Tarehe Iliyowekwa: February 14th, 2024

Wananchi Wilayani Makete mkoani Njombe, wametakiwa kutunza vyanzo vya maji katika maeneo yao ikiwa ni pamoja na kutofanya shughuli mbalimbali za kibinadamu katika maeneo hayo kama vile kilimo pamoja na kukata miti hovyo, sambamba na kupanda miti isiyo rafiki na maji.

Wito huo umetolewa na Ndg. Nyairobi Sayi Masalu kutoka Ofisi ya Mazingira , Halmashauri ya Wilaya ya Makete, wakati wa zoezi la upandaji wa miti aina ya Mzambarau kwenye chanzo cha maji eneo la Dombwela B lililopo Kata ya Iwawa, Wilayani Makete. 

"Acheni kupeleka wanyama kwenye vyanzo vya Maji, hususani Ng'ombe na mifugo mingine kwakuwa mnaharibu vyanzo hivyo, na kupelekea kukosa Maji Kwa siku za mbeleni" Alisema Ndg. Masalu.

Aidha, Ndg. Masalu amesema kuwa, wao kama ofisi ya mazingira watawachukulia hatua kali za kisheria wale wote watakaoendelea na shughuli za ufugaji na Kilimo kwenye vyanzo vya maji kwakuwa sheria inairuhusu kuanzia mita 60 kutoka chanzo cha Maji.

Naye, Mwenyekiti wa Mamlaka ya Mji mdogo wa Iwawa ambae pia ni Mwenyekiti wa mtaa wa Dombwela Mhe. Joseph Mbilinyi ameishukuru ofisi ya mazingira Makete kwa utunzaji wa vyanzo vya maji na mazingira na amewataka wananchi kuacha mara moja kufanya shughuli za kibinadamu karibu na vyanzo vya maji kwani kumekuwa na uharibifu mkubwa unaotokana na kazi hizo. 

Nao baadhi ya wananchi, wakiwemo wafugaji waliofika katika zoezi hilo la upandaji wa miti kwenye chanzo hicho akiwemo Bw. Boniface Kyando, amesema kuwa upandaji wa miti katika eneo hilo utasaidia kwa kiasi kikubwa utunzaji wa chazo hicho, ambapo ametoa wito kwa wananchi kutopekleka mifugo yao katika eneo hilo kutokana na uharibifu unaowezajitokeza katika chanzo hicho.

Ikumbukwe kuwa, miti zaidi ya sabini imepandwa katika eneo hilo huku ofisi ya mazingira Wilayani Makete, ikisema kuwa zoezi hilo la upandaji wa miti katika vyanzo vya vya maji hapa Wilayani Makete ilitakuwa endelevu, na kwamba maeneo mengine pia yatafikiwa hivi karibuni.

Imeandaliwa na:

Kitengo cha Mawasiliano, 

Halmashauri ya Wilaya ya Makete.