WANANCHI WAASWA KUJITOKEZA KUPIMA KIFUA KIKUU TAREHE 10 APRILI 2023

Tarehe Iliyowekwa: April 9th, 2023

Wizara ya Afya kwa kushirikiana na Tanzania Health Promotion Support kesho tarehe 10 Aprili 2023 itafanya huduma tembezi ya kupima maambukizi ya ugonjwa wa Kifua Kikuu (TB) wakiwa na Madaktari bobezi.

Mratibu wa kifua Kikuu Wilaya ya Makete Dkt. Jonathan Kitundu amesema zoezi hilo litafanyika kwa siku moja ambayo ni kesho Jumatatu ya Aprili 10, 2023.

Dkt. Kitundu amesema zoezi hilo litafanyika sehemu zenye mikusanyiko ya watu ikiwemo Gereza la Ndulamo na eneo la Mabehewani Makete mjini huku akianisha kuwa huduma hiyo itatolewa bure (bila malipo yoyote).

Huduma hiyo tembezi ni nadra kutokea hivyo wananchi wametakiwa kutumia fursa hiyo kujitokeza kwa wingi kupima maambukizi ya Kifua kikuu kwani kutakuwa na gari lenye wataalamu bobezi na vipimo vya maabara vitachukuliwa hapo na majibu kutolewa papo hapo.

Idara ya Afya hutoa huduma hizo kila siku lakini kwa siku hiyo itakuwa ni huduma maalumu itakayotolewa na wataalamu hao na kusaidia katika kutafsiri vipimo mbalimbali vitakavyochukuliwa siku hiyo.