WANANCHI WILAYANI MAKETE WASHAURIWA KUTATUA CHANGAMOTO ZAO KWA USULUHISHI

Tarehe Iliyowekwa: May 29th, 2024

Wananchi Wilayani Makete, Mkoani Njombe, wametakiwa kuishi kwa Amani na Upendo na kutatua migogoro yao kwa njia ya Usuluhishi ili kujiepusha na sintofahamu mbalimbali katika Jamii

Rai hiyo, imetolewa leo Mei, 29, 2024, na Mkuu wa Wilaya ya Makete Mhe. Juma S. Sweda, wakati akiongea na Wananchi wa Vijiji vya Masisiwe na Ukwama vilivyopo katika Kata ya Ukwama, kwenye mkutano wa kujengewa Uelewe wa Kisheria.

"Migogoro katika jamii inachochochea uvunjifu wa amani na kusababisha jamii kuishi katika chuki, tumieni fursa hii ya uwepo wa wasaidizi hawa wa Kisheria kutatua migogoro yenu" Alisema Sweda.

Aidha, Mhe. Sweda, amewataka wazazi kuwalea watoto wao katika maadili mema na kuacha ugomvi katika familia zao, kwakuwa watoto watajengewa tabia isiyoridhishwa katika jamii.

Kwa Upande wake, Mkurugenzi Mtendaji wa Halmashauri ya Wilaya Makete, Ndg. William Makufwe amewapongeza watalaamu hao wa msaada wa kisheria kwa kazi wanayoifanya ya kutoa Elimu ya kisheria huku akiwaomba wananchi kujitokeza kwa wingi kwaajili ya kupata elimu hiyo.

Ikumbukwe kuwa Kampeni hiyo ya Msaada wa Kisheria ya Mama Samia, itaendelea kutolewa Wilayani Makete hadi June 5, 2024.