WANANCHI WILAYANI MAKETE WATAKIWA KUSHIRIKI KWENYE MBIO ZA MWENGE WA UHURU

Tarehe Iliyowekwa: June 1st, 2024

Mratibu wa Mbio za Mwenge wa Uhuru mkoa wa Njombe Ndg. Flavian Kitago amesema kuna haja ya kuwahimiza wananchi kushiriki katika shughuli za Mbio za Mwenge wa Uhuru, kutokana na umuhimu wake katika kuchochea Maendeleo katika jamii.

Ndg. Kitago, amesema hayo leo, Juni 1, 2024 wakati wa ukaguzi wa miradi itakayopitiwa na Mwenge wa Uhuru mwaka huu wa 2024, ambapo ziara hiyo imefanyika na Kamati ya uratibu wa Mbio za Mwenge wa Uhuru Mkoa wa Njombe kwa kushirikiana na Kamati ya uratibu wa Mbio za Mwenge wa Uhuru Wilaya ya Makete.

Aidha Ndg. Kitago amewashauri wasimamizi wa Miradi, kuhakikisha kuwa Miradi hiyo inakamilika na Uwepo wa nyaraka zote muhimu, ili ilete tija katika jamii.

Kwa Upande, Mkurugenzi Mtendaji Wa Halmashauri ya Wilaya ya Makete, Ndg. William M. Makufwe amesema kuwa, mikakati ya halmashauri ni kuhakikisha miradi yote inakamilika ili iweze kutumika na wananchi wa maeneo husika.

Nae Kamishina Msaidizi wa Jeshi la Polisi Mkoa wa Njombe, Ndg. Abubakar Kunga amelitaka Jeshi la polisi Wilaya ya Makete, kudumisha ulinzi na usalama siku ya Mbio za Mwenge wa Uhuru, ili wananchi waweze kusherehekea kwa amani na Utulivu.

Nae Diwani wa Kata ya Ikuwo Mhe. Gwelino Mwasanga ameishukuru Kamati ya Mbio za Mwenge Uhuru, Wilayani Makete kwa uamuzi wa kupeleka mradi wa Maji katika Shule ya Msingi Ighala, kwakuwa unaenda kutatua adha ya huduma hiyo shuleni hapo pamoja na wananchi waishio maeneo ya jirani.