WANANCHI ZAIDI YA 19,000 KUNUFAIKA NA MRADI WA MUM MAKETE

Tarehe Iliyowekwa: June 1st, 2023

Wataalamu wa Maji kutoka RUWASA Taifa, Mkoa na Wilaya ya Makete wamefika Ofisi ya Mkuu wa Wilaya ya Makete kutoa taarifa juu ya Program ya Maji na Usafi wa Mazingira (MUM) kupitia ufadhili wa Watu wa Marekani.

Program hiyo inatarajiwa kutekelezwa katika Wilaya ya Makete na Ludewa Mkoa wa Njombe kwa Lengo kuboresha upatikanaji wa huduma ya Maji, usafi wa Mazingira, kutoa kipaumbele katika kuimarisha, utendaji kazi wa raslimali watu na kuhakikisha kunakuwepo ushirikishwaji wa Jamii katika utekelezaji wa miradi ya Maji pamoja na usimamizi na uendeshaji wa Skimu za Maji kwa kuziimarisha CWBSOs.

Akitoa taarifa ya utekelezaji wa Mradi huo Meneja wa RUWASA Makete Mhandisi Innocent Lyamuya amesema mradi huo utasaidia upatikanaji wa kutoa huduma kwa Wananchi Zaidi ya 19,439 katika Wilaya ya Makete.

Enock Wapala kutoka RUWASA Makao Makuu amesema lengo la RUWASA kwa kushirikiana na Tetratech inayotekeleza Program ya MUM ni kuhakikisha huduma ya Maji inakuwa bora na endelevu katika kijiji cha Ihanga, Luwumbu, Makusi, Lugoda na Magoye ambayo itafanyiwa usanifu na kujengwa.

Kwa niaba ya Mkuu wa Wilaya ya Makete Mhe. Juma Sweda, Afisa Tarafa ya Lupalilo Augustino Ngailo amewapongeza RUWASA na Tetratech kupitia Program MUM kwa kutambua umuhimu wa kuongeza huduma za Maji safi na Maji Taka katika maeneo yaliyoainishwa ikiwemo Iwawa na Ikonda huku akiahidi ushirikiano kwa kila hatua.

Kaimu Mkurugenzi Halmashauri ya Wilaya ya Makete Bi. Jacklin Mrosso amesema Halmashauri ya Wilaya ya Makete kwa kushirikiana na RUWASA, Tetratech na Mamlaka ya Maji na usafi wa Mazingira Makete (MAKEUWASA) wapo tayari kuhakikisha wananchi wanapata huduma hiyo wakiwemo wananchi wa Kigulu.