WANAOPOTOSHA KUHUSU CHANJO YA UVIKO-19 WACHUKULIWE HATUA

Tarehe Iliyowekwa: July 13th, 2022

Mkuu wa Wilaya ya Makete Mh. Juma Sweda ameagiza kuchukuliwa hatua kwa mtu yeyote atakayebainika kupotosha zoezi la uchanjaji wa chanjo ya UVIKO-19.

Agizo hilo ni kufuatia uwepo wa baadhi ya watu kupotosha wananchi kuhusu chanjo ya UVIKO-19 ambapo watendaji wa vijiji wamebainisha kuwa zoezi hilo linakwamishwa na baadhi ya watu wenye nia mbaya na wananchi.

Akizungumza na watendaji wa Vijiji, Kata na wakuu wa Idara hapo jana tarehe 13 julai kwenye ukumbi wa Halmashauri ya Wilaya ya Makete Mh. Sweda amesema uwepo wa baadhi ya watu wachache kupotosha wananchi kuhusu chanjo usisababishe kukwama kwa zoezi la kuwafikia wananchi kutoa elimu na kuwachanja chanjo ya UVIKO-19 kupitia kampeni iliyoanza tarehe 11 julai na itahitimishwa tarehe 18 julai 2022.

“Asitokee mtu tofauti kutoa maelekezo yaliyo kinyume na utaratibu, sio watu wote wanakubaaliana na zoezi hili lakini wale wanaopotosha kuhusu maelekezo ya Serikali wachukuliwe hatua, hatulazimishi watu kuchanja lakini tunahakikisha tunatoa elimu ya kutosha ili waelewe umuhimu wa kuchanja”

Mkurugenzi Mtendaji Halmashauri ya Wilaya ya Makete ndg, William Makufwe amewaasa watendaji hao kwa kushirikiana na watoa huduma za Afya kuhakikisha wanatoa elimu kwa wananchi wao juu ya umuhimu wa zoezi hilo ambalo linaweza kuwasaidia wananchi kuwakinga na kueneza maambukizi ya UVIKO-19

“Kampeni tuliyonayo sasa ni kuhakisha tunatoa elimu ya umihimu wa chanjo kwa kumfanya mtu kuwa na hali nzuri kiafya, usalama wa watu wetu ni kuhakikisha wamechanjwa, kila nyumba tutaifikia kutoa elimu ya chanjo”.

Mganga Mkuu wa Wilaya ya Makete Ligobert Kalisa amesema zoezi la kuchanja wananchi linafanyika nchi nzima, hivyo katika Wilaya ya Makete wanatarajia kuwafikia wananchi zaidi ya 70% kuanzia umri wa miaka 18 na kuendelea.

“Tumejipanga vizuri kupitia wahudumu wetu wa Afya kuanzia ngazi ya Kijiji mpaka Wilaya kuhakikisha wananchi wetu wanapata chanjo ili wawe salama, hivyo niwaombe wananchi wajitokeze na kutoa ushirikiano ili kufanikisha zoezi hili muhimu kwa watanzania”.

Kampeni ya chanjo imeanza tarehe 11 julai 2022 mpaka tarehe 18 julai, 2022.