WANAUME TIMIZENI MAJUKUMU YENU KATIKA KUPAMBANA NA UDUMAVU

Tarehe Iliyowekwa: November 23rd, 2023

Wanaume wametakiwa kushirikiana na wake zao katika kuhakikisha mtoto mdogo analelewa kwa kuzingatia Lishe Bora tangu kutungwa kwa ujauzito, ili kutokomeza Udumavu hapa nchini, pamoja kuwa kizazi kijacho chenye uwezo mkubwa kiakili.

Hayo yamesemwa leo Novemba 23, 2023, na Kaimu Afisa Lishe wa Wilaya ya Makete, Bi. Agnes Columbani, wakati akitoa Elimu ya Umuhimu wa matumizi ya Lishe Bora kwa watoto wadogo wenye umri chini ya miaka 2, katika vijiji vya Ukange na Igumbilo, vilivyopo kata ya Lupila, kuwa suala la Malezi ya mtoto mdogo ni la wazazi wote, hivyo baba anatakiwa kuhakikisha kuwa mahitaji yote muhimu kama vile Chakula Bora,kinapatikana nyumbani.

"jukumu la baba si kuweka tu ujauzito na kumwacha mama apambane nao mwenyewe, mtoto anatakiwa kupata matunzo tangu akiwa tumboni mwa mama yake, kwa kuhakikisha kuwa mjamzito anapata Lishe Bora ambayo itamfanya mtoto akue vizuri " Alisema Bi. Agnes Columbani.

Kwa Upande wake, Kaimu Afisa Maendeleo ya Jamii wa Halmashauri ya Wilaya ya Makete, Bi. Esther Lamosai, amekemea vitendo vya Ukatili kwa watoto wadogo ambavyo vimeonesha kukithiri, katika siku za hivi karibuni, ikiwa ni pamoja na kupambana na mimba za utotoni.

"kumekuwa na ongezeko la Mimba za utotoni, kwa siku za Karibuni, na kupelekea ongezeko la Udumavu kwa watoto wadogo, hivyo basi kila mtu awajibike Kwa nafasi yake kama mzazi" Bi. Esther Lamosai.

Naye, mkazi mmoja wa Kijiji cha Ukange, Bi. Epifania Ndelwa, amewashukuru wawezeshaji kwa kutoa Elimu hiyo, ambayo imewafungua kwa kiasi kikubwa, ambapo imewapelekea kutambua umuhimu wa Lishe Bora, pamoja na majukumu ya kila mzazi ndani ya familia.

"wanaume wengi wamekuwa wanatuachia sisi akinamama katika jukumu la kulea Watoto wadogo, ndio maana Utapiamlo unaongezeka, hivyo tunashukuru sana kwa huu ujio wenu, mmetusaidia sana kuwafanya akinababa wayajue majukumu yao ya kulea mtoto kwa kutoa Lishe Bora tangu akiwa tumboni mwa mama" Alisema Bi. Epifania Ndelwa.

 Ikumbukwe kuwa, Kampeni ya utoaji elimu ya Umuhimu wa Lishe Bora kwa Watoto wadogo, chini ya Umri wa miaka miwili, imeendelea leo Novemba 23, 2023, katika Kata ya Lupila, ambapo timu imetembelea vijiji viwili vya Ukange na Igumbilo