WANUFAIKA WA MIKOPO WATAKIWA KUZITUMIA FEDHA HIZO KWENYE MIRADI ILIYOKUSUDIWA

Tarehe Iliyowekwa: December 31st, 2024

Mwenyekiti wa Halmashauri ya Wilaya ya Makete, Mhe. Christopher Yonam Fungo, leo Desemaba 31, 2024, amewataka wanufaika wa mikopo ya asilimia 10% ya mapato ya ndani ya Halmashauri, kuhakikisha kuwa wanatumia fedha hizo kwenye malengo yaliyokusudiwa na vikundi vyao ili ziwe na tija kiuchumi.  

Mhe. Fungo, amesema hayo wakati wa hafla ya uzinduzi wa Utoaji wa mikopo hiyo, kiasi cha shilingi milioni 449,000,000.00, ambayo imefanyika katika ukumbi wa Bomani, uliopo Halmashauri ya Wilaya ya Makete.

“Fedha hizi mnazopewa leo sio hisani, nendeni mkazifanyie kazi iliyokusudiwa ili ziwe na tija katika maisha yenu, sitegemei kuona baadae tunaanza kutafutana kwamba kuna vikundi vimeshindwa kurejesha, haifurahishi, kwahiyo hakikisheni mnazitumia vizuri kama malengo ya kikundi yanavyotaka” alisema Mhe. Fungo.

Aidha, Mhe. Christopher Yonam Fungo, amemshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kuweka mfumo mzuri wa utolewaji wa mikopo hiyo, ambayo hapo awali ilionekana kuwa na changamoto katika urejeshaji wake.

Kwa Upande Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amesema kuwa, vikundi vimekuwa vikitumia fedha tofauti na kusudio na kupelekea changamoto katika urejeshaji, sambamba na kutokakaa vikao ambavyo vingeweza kuwasaidia kutatua changamoto ambazo wanakutana nazo katika utekelezaji wa mipango yao.

Pia,   Ndg. Makufwe, ameabainisha kuwa, Halmashauri imetoa kiasi cha shilingi milioni 449, ikiwa ni awamu ya kwanza ya utolewaji wa mikopo hiyo, kwa vikundi 52, ambayvo vinatoka katika kata 10, na kwamba awamu ya pili itatolewa zaidi ya milioni 500, kwa vikundi ambavyo vitakuwa viemekidhi matakwa ya utolewaji wa mikopo hiyo.

Naye, Mwenyekiti wa Umoja wa Vijana wa Chama cha Mapinduzi, UVCCM, Wilaya ya Makete, Ndg. Tamson Mbilinyi, ameseama kuwa, utolewaji wa mikopo hiyo ni utekelezaji wa Ilani ya Chama cha Mapinduzi ili kuhakikisha wananchi wanakuwa na uwezo wa kujiendeleza kiuchumi.

Ikumbukwe, kuwa Halmashauri ya Wilaya ya Makete, imetoa kiasi cha Shilingi Milioni 449, kwa vikundi 52 kutoka kwenye kata 10, ambapo vikundi vya Vijana vipo 24, Wanawake vikundi 26, na Watu wenye Ulemavu vikundi 2, ikiwa ni awamu ya kwanza ya utolewaji wa mikopo hiyo.