WATENDAJI WATAKIWA KUSIMAMIA MAPATO KIWELEDI

Tarehe Iliyowekwa: September 18th, 2023

Mwenyekiti wa Halmashauri ya Wilaya ya Makete Mhe. Christopher Yonam Fungo, amewataka watendaji wote kuanzia ngazi ya kata hadi vijiji kuhakikisha wanakusanya mapato ya kutosha ili serikali iweze kutimiza wajibu wake kwa wananchi.

Mh. Fungo, amesema hayo leo September 18, wakati akizungumza na watendaji kata, vijiji, makatibu Tarafa pamoja na wakuu wa idara na vitengo, kuwa kila mtu lazima awajibike kwa nafasi yake ili kuhakikisha halmashauri inakuwa na mapato ya kutosha.

Naye mkurugenzi Mtendaji wa Halmashauri ya Wilaya ya Makete Ndg. William Makufwe amewataka watendaji wa vijiji na kata, kujua vipaumbele vyao katika utumishi wa umma, ili kuwe na ufanisi katika utendaji kazi wao.

Aidha Ndg. Makufwe ameongeza kuwa endapo kuna mtendaji hatakuwa tayari kuendana na kasi ya serikali ya sasa ni bora atafute shughuli nyingine ya kufanya kwakuwa hawatakuwa tayari kuvumilia upotevu wa mapato ambao unafanywa na baadhi ya watumishi.

Kwa upande mwingine, mkurugenzi mtendaji wa halmashauri ya wilaya ya Makete, amewataka wafanyabiashara kuhakikisha kuwa wanakata ushuru wa bidhaa zao katika kijiji husika ambacho amenunulia mzigo wake ili kutokumbana na faini au mkono wa sharea.

Kwa upande wake katibu Tarafa wa Lupalipo Ndg. Augustino Alex Ngailo, ameupongeza uongozi wa Halmashauri pamoja na menejimenti kwa ujumla kwa kuamua kusikiliza changamoto za watendaji wa vijiji pamoja na kata, ambazo wamekuwa wakikutana nazo katika shughuli zao za kila siku hasa katika ukusanyaji wa mapato.

Kitengo cha Mawasiliano Serikalini

Halmashauri ya Wilaya ya Makete.