WATU ZAIDI YA 400 WAKIWEMO WAFUNGWA MAGEREZANI WAMEPIMWA KIFUA KIKUU MKOA WA NJOMBE

Tarehe Iliyowekwa: April 10th, 2023

Zaidi ya watu 400 wakiwemo Wafungwa, Askari Magereza na Jamii inayowazunguka Mkoa wa Njombe wamepimwa maambukizi ya Ugonjwa wa Kifua Kikuu (TB) ikiwa ni mkakati wa kupambana na Kifua Kikuu kwa watu waliopo maeneo hatarishi.

Serikali kwa kushirikiana na Tanzania Health Promotion Support leo tarehe 10 Aprili wakiwa na Wataalamu wa Afya kutoka Hospitali ya Taifa ya Magonjwa ya Kuambukiza Kibong’oto wamewezesha kufanya zoezi hilo katika Mkoa wa Njombe ikiwa ni moja ya mikoa inayokabiliwa na maambukizi ya Kifua Kikuu.

Mratibu wa Kifua Kikuu Kisulila Matanga kutoka Ofisi ya Mkuu wa Mkoa wa Njombe amesema zoezi la kutoa Elimu ya Kifua Kikuu na uchunguzi limefanyika katika Mkoa wa Njombe na kuhakikisha wanapunguza maambukizi ya Kifua Kikuu kwa wananchi.

Matanga amesema kuwa Wilaya ya Ludewa inaongoza kwa kuwa na maambukizi mengi ya Kifua Kikuu, ikifuatiwa na Wilaya ya Makete huku akibainisha kuwa matokeo ya ugunduzi wa Kifua Kikuu yameanza kuonekana.

Dkt. Guido Libaba Meneja ufundi mradi wa USAID Police and Prisons Activity Kanda ya Kati na Kusini amesema lengo la mradi ni kutoa huduma katika Vituo vya Afya vya Polisi, Magereza na Jamii inayowazunguka.

Baadhi ya Wananchi  waliopata huduma ya upimaji na Elimu ya Kifua Kikuu wameshukuru Serikali kupitia mradi wa USAID Police and Prisons Activity kwa kuwasogezea huduma karibu huku wakiwasihi wananchi wengine kujitokeza kupima Afya zao mara kwa mara 

Zoezi hilo limeanza tarehe 6 Aprili na litahitimishwa tarehe 12 Aprili 2023 katika Mkoa wa Njombe ambapo inatarajiwa watu zaidi ya 500 watakuwa wamepimwa kifua Kikuu