WATUMISHI MAKETE WATEMBELEA KITUO CHA WATOTO YATIMA BULONGWA

Tarehe Iliyowekwa: June 16th, 2022

Ofisi ya Maendeleo ya Jamii na Ustawi wa Jamii Wilaya ya Makete kwa kushirikiana na watumishi wametembelea kituo cha watoto yatima Bulongwa na kutoa msaada wa vyakula mbalimbali na zawadi kwa watoto hao

Zawadi hizo zimetolewa leo kituo cha watoto yatima kilichopo kata ya Bulongwa katika kuadhimisha siku ya mtoto wa Afrika inayofanyika kila mwaka juni 16.

Afisa Maendeleo ya Jamii Halmashauri ya Wilaya ya Makete Bi. Jacline Mrosso ameshukuru uongozi wa Kanisa la kiinjili la Kilutheri Tanzania Dayosisi ya Kusini Kati Makete (KKKT-DKK) kwa moyo wa upendo ambao Kanisa hilo na watumishi wa kituo hicho wanavyowalea Watoto hao

Watoto wanaolelewa kituoni hao wamekutana na changamoto mbalimbali ikiwemo kufiwa na wazazi wao, ulemavu, na wengine wazazi wao kupata kichaa cha mimba mara baada ya kujifungua.

“Niwashukuru sana Kanisa, watumishi pamoja na wadau wanaojitolea kuwalea watoto hawa kwa hali na mali, kuishi na mtoto ambaye siyo wako sisi sote tunajua jinsi ilivyo changamoto lakini ninyi mnaweza Mungu awasaidie sana muendelee kuwa na moyo huo wa upendo”.

Meneja wa Kituo cha kulelea Watoto bi. Vaileth Chaula amewashukuru wadau hao na Serikali jinsi ambavyo wamekuwa wakitoa msaada mara kwa mara kwa Watoto wanaohudumiwa na kituo hicho.

“Naishukuru Serikali, wadau Pamoja na Mheshimiwa Mbunge Festo Sanga mmekuwa bega kwa bega katika kuwalea watoto hawa ambao wanauhitaji mkubwa wa mahitaji muhimu waliyoyakosa kutoka kwa wazazi wao, Mungu awaongezee zaidi”.

Mhasibu wa kituo hicho Ndg. Fastuel Nkwama pamoja na kuwashukuru wadau hao amesema kituo kinakabiliwa na changamoto mbalimbali ikiwemo wadau kutoka nchini Sweden ambao wamesitisha kutoa huduma tangu janga la COVID-19 lilipoanza hivyo kupelekea upungufu wa mahitaji kwa watoto.

Kituo cha watoto yatima Bulongwa kwa sasa kinawatoto 17 wanaolelewa hapo na wengine wakindelea na masomo ya sekondari, shule ya msingi na awali na mmoja akiwa chuo cha Veta Makete.