WAZIRI WA MALI ASILI NA UTALII, MHE,DKT.PINDI CHANA, AAGIZA KUUNDWA VIKOSI KAZI KWENYE VIJIJI, KUKABILIANA NA MAJANGA YA MOTO

Tarehe Iliyowekwa: October 8th, 2024

Waziri wa Mali Asili na Utalii nchini Tanzania, Mhe. Dkt. Pindi Chana, ameagiza kupatikana kwa majina ya vijana katika kila kijiji Wilayani Makete, ambako kumekuwa na uharibifu mkubwa wa uchomaji moto hovyo, ambao watapewa mafunzo ya Ulinzi wa Mali Asili na Utunzaji wa Mazingira.

Mhe. Dkt. Pindi Chana, amesema hayo leo, Oktoba 8,2024, wakati ametembelea makao makuu ya Wilaya ya Makete, na kukutana na Viongozi mbalimbali akiwemo Mkuu wa Wilaya ya Makete, Mhe. Juma S. Sweda, pamoja Kaimu Mkurugenzi wa Halmashauri ya Wilaya ya Makete, Ndg. Humphrey Mushi.

“Maagizo ya Mheshimiwa Rais ni kuwa kila kijiji kiwe na Game Scout Village, (GSV), ambao watakuwa na jukumu la kuhakikisha kuwa kunakuwa na usalama wa Mali Asili zetu zilizopo vijijini ili kupunguza changamoto hizi za uchomaji miti hovyo” Alisema Dkt. Pindi Chana.

Aidha, Waziri Chana, ameagiza kukaguliwa kwa Sheria ndogo zilizoundwa, kama zinakidhi ili ziweze kutumika katika kuwachukulia hatua wale wote ambao wamekuwa wakiharibu mazingira sambamba na kutia hasara kwa wamiliki wa miti.

Kwa upande Mwingine, Waziri huyo wa Mali Asili na Utalii, ameagiza Idara za Kilimo, Mali Asili na Mazingira kuhakikisha kuwa wanatoa elimu ya kutosha kuhusu namna bora ya Uandaaji wa Mashamba pamoja na madhara ya uchomaji miti hovyo, na kwamba agenda ya uchomaji moto iwe ya kila kikao.

Pia Waziri Pindi Chana, ameagiza Mamlaka za Utafiti wa Misitu, kama vile TAFORI, kuhakikisha kuwa wanafanya tafiti ambazo zitapunguza matumizi makubwa ya ukataji miti ya asili kwa ajili ya mkaa, kwa kubaini miti ya kupanda ambayo itakuwa inatumika katika uchomaji mkaa.

Kwa Upande wake, Mkuu wa Wilaya ya Makete, Mhe. Juma S. Sweda, amemshukuru waziri huyo, na kwamba wamepokea maagizo na watayafanyia kazi kama wilaya, ili kuhakikisha kuwa uharibifu wa mazingira kupitia uchomaji moto hovyo haujirudii tena.

Hata hivyo, Afisa Mali Asili na Mazingira, Wilaya ya Makete, Ndg. George Gujonjo, akisoma taarifa ya uchomaji moto hovyo, mbele ya Waziri wa Mali Asili na Utalii, Mhe. Dkt. Pindi Chana, amesema kuwa, zaidi ya ekari 1960, zenye thamani ya Tsh. 1,494,653,942, zimechomwa moto, na kupelekea hasara kubwa kwa wamiliki wa misitu ya Kupanda na Asili.

 Imeandaliwa na:

Kitengo cha Mawasiliano ya Serikali, 

Halmashauri ya Wilaya ya Makete