WAZIRI WA VIWANDA NA BIASHARA MHE. DKT. SELEMEMAN SAID JAFO, ASISITIZA AMANI, UPENDO NA USHIRIKIANO KATIKA UKUZAZI WA UCHUMI NCHINI

Tarehe Iliyowekwa: February 19th, 2025

Waziri wa Viwanda na Biashara Mhe. Dkt. Seleman Said Jafo, leo Februari 19,2025, ametoa rai kwa wakazi wa mkoa wa Njombe, kuendeleza na kusimamia ipasavyo utekelezwaji wa miradi mbalimbali ya kimkakati iliyopo mkoani humo ili iweze kuwa na tija kwa taifa na watanzania kwa ujumla.

Mhe. Dkt. Jafo ametoa rai hiyo, wakati akiongea kwenye Mkutano wa Wadau wa Sekta ya Viwanda, Biashara na Uwekezaji wa Mkoa wa Njombe, ambao umefanyika kwenye Ukumbi wa mikutano uliopo kwenye  Ofisi za Mkuu wa Mkoa huo zilizopo Mtaa wa Lunyanyi, mjini Njombe.

“Kuna Nchi hapa Duniani hawaamini kama Tanzania inawewa kuwa na miradi mkakati Mikubwa ya maendeleo yenye uwezo wa kuliletea taifa faida kiuchumi, hivyo nendeni mkawekeze ikiwa ni pamoja kusimamia vizuri miradi iliyopo, na ile ambayo inatekelezwa ikatimie kwa faida ya Taifa letu” alisema Dkt. Jafo.

Aidha, Dkt. Jafo, ameongeza kuwa hakuna Nchi yeyote itakayoweza kufanikiwa kiuchumi kama haina Amani, hivyo amewataka watanzania kudumisha Upeno na Mshikamano hasa kipindi hiki cha kuelekea kwenye uchaguzi mkuu.

Sambamba na hayo, Mhe. Jafo ameongeza kuwa, changamoto zote zilizotolewa hapo ni mtambuka hivyo kila Waziri mwenye dhamana atapelekewa eneo lake ili zifanyiwe kazi, kwakuwa serikali ya Jamhuri ya Muungano wa Tanzania inataka watanzania waweze kukua kiuchumi.

Kwa Upande wake, Mkuu wa Mkoa wa Njombe, Mhe. Antony Mtaka, amesema kuwa wakazi wa mkoa wa Njombe ni wachapakazi, kutokana na kuwepo kwa rasilimali nyingi, ambapo amemhakikishia Waziri Jafo kuwa, mkoa huo unazidi kubadirika kiuchumi kadri siku zinavyoenda.  

Naye, Mkuu wa Wilaya ya Njombe, Mhe. Juma Samwel Sweda, amesema kuwa wamepokea maagizo, kwamba mazingira yote ya uwekezaji yameandaliwa vizuri, na uchumi wa wananjombe utakuwa kwa nguvu kupitia sekta ya Kilimo na vyanzo vingine.

Ikumbukwe kuwa, Waziri wa Viwanda na Biashara Mhe. Dkt. Seleman Said Jafo, amekuwa na ziara ya kikazi mkoani Njombe, tangu Februari 17, 2025 akianzia wilaya ya Ludewa, ambapo leo kabla ya kumalizia Wanging’ombe na Makambako, amekutana na Wadau wa Sekta ya Uwekezaji na Biashara, Wakuu wa Idara na Vitengo mbalimbali wa Mkoa na Halmashauri ili kujadili changamoto na kuzitafutia ufumbuzi.