ZINGATIENI LISHE BORA – DKT. KALISA

Tarehe Iliyowekwa: October 26th, 2023

Mganga Mkuu wa Halmashauri ya Wilaya ya Makete, Dkt. Ligobert Kalisa amewataka vijana wa rika balehe kuzingatia lishe bora, ili waweze kutimiza malengo yao kama kauli mbiu ya kilele cha siku ya lishe duniani inavyo sema, “Lishe bora kwa vijana balehe ni chachu ya mafanikio yako”

Dkt. Kalisa, amesema hayo, wakati wa kilele cha siku ya lishe Duniani, ambayo imefanyika Oktoba 26,2023, katika shule ya sekondari Iwawa, iliyopo wilayani Makete kuwa,  lishe bora ni muhimu katika makuzi ya kijana ili awe na uwezo wa kufikiri pamoja na kufanya maamuzi sahihi.

Kwa upande Afisa lishe Wilaya ya Makete Bi. Jackline Nanauka, amesema kuwa, wamefanikiwa kuuunda klabu za lishe 132, katika shule za Msingi 106 na sekondari 26 ili kuhakikisha mwanafunzi anapata angalau mlo mmoja kwa siku.

Naye mwanafunzi wa shule ya Sekondari Iwawa, Bright Musomi, ambaye pia ni katibu wa klabu ya lishe shule katika shule hiyo, amesema kuwa klabu hiyo imemsaidia kwa kiasi kikubwa namna ya kuandaa lishe bora, ambapo amewaomba wazazi na walezi kuzingatia mlo kamili wenye makundi yote ya chakula kwa lengo la kupunguza udumavu katika wilayani Makete.   

Imeandaliwa na: 

Kitengo cha Mawasiliano Serikalini, 

Halmashauri ya Wilaya ya Makete.